"النور بعد الظلام"

 "النور بعد الظلام"

بقلم: الدكتورة خديجة فناني 

العقر و مايدير

أنا واحد المرأة جالسة في الدار

غانعاود ليكم ماجرا ليا كي خرافة الزمان

هادي ست سنين 

وانا مزوجة براجل متبت مزيان

عايشة في سعادة و عندي كل الخير

لاكني عاقرة و السبب ماعرفتش منين

شي تايقول تزوجتي كبيرة

شي تايقول سحراتك بنت الجيران

الوالي لي قالولي تانزورو

و الطالب لي قالولي 

نشرب سبوبو و ندوب اللدونو

كلت قديد مئات دار

و تبخرت بالفيجل و البلعمان

العدوزة قاطعة كلامي

و الوالدين هازين كفوفهم الرحمان

الراجل خارج داخل فكعان

هاز راسو للسما غضبان

كلمة جوج يردخ البيبان

يهز عليا كتيفاتو و يقول لي باغي الصبيان

نشوفو شارد ولهان

عنداك غير يديرها يخوي المكان

ولات داري جهنم

وليت تالفا جايلا في الطرقات

قلت لازم ندير حل باش نعيش فالأمان

عطيت راسي للسبيطار

شافني الطبيب قالي علاش ماجيتيش من زمان

قلت ليه تبعت كلام البهلان

حتى شفيت فيا العديان

قالي خاصك تنعسي عندنا شي أيام فالسبيطار

باش نعرفو العلة مزيان

قلتها لراجلي قالي آش هاد البهلان

لاكني قنعتو بالحجة بالبرهان

درنا التحليلات

خرجات النتيجة 

قالي الطبيب الحمد لله باقي مافاتش الأوان 

الطب تقدم حقق المعجزات فهاد الميدان

خدينا الأدوية و تبعنا كلام الطبيب بإتقان

خرجت نولد بجاه ربي العدنان

رزقنا ربي التوام

جوج بنات غزلان

دبحنا الخرفان

وحدا سميتها حنان و الأخرى وجدان

راجلي يدور و يقول مرحبا بمولات الدار

مع الجيران دارلي الهمة و الشان

و دازو عامين يا الأخوات و الإخوان

رزقني ربي بالتوام

واحد سميتو عدنان و الاخر سفيان

عشنا في سعادة و كلشي فرحان

حمدت الله العظيم المنان